Stay Focused

呢個係【泰拳系列】嘅第五個設計。
拳套鎖匙扣係我好多年前嘅作品，
到而家，無論自己嘅心態，
定係週圍嘅環境都變化好大。

之前拳套鎖匙扣嘅設計係一隻嬲豬嘅貓貓，
但係持續嘅嬲怒係一種破壞性嘅情緒。
就好似拎住一舊焫手嘅炭，
不斷想瞄準目標，
但係冇機會掟出去，
咁焫親手嘅就只有自己。

所以畫咗呢幅畫嚟提醒自己，
要將冇益嘅憤怒，
轉化為專注於實現自己目標嘅推動力！
唔好比情緒、環境擾亂我哋嘅步伐！