鴞鸚鵡

最近我經常睇 Kākāpō Cam 嘅直播
呢個黑鼆鼆嘅鏡頭影住嘅係新西蘭一個偏遠嘅小島上，
雌性鴞鸚鵡 Rakiura mami 嘅巢穴
鴞鸚鵡係世界上唯一唔識飛嘅鸚鵡
全球只剩番 235 隻，係極度瀕危嘅物種
鴞鸚鵡嘅繁殖季節取決於 Rimu 樹嘅果實產量，
只有每兩到四年 Rimu 果實嘅大產年鴞鸚鵡先會繁殖。

今年就係鴞鸚鵡嘅繁殖年
所以保育團隊就開咗呢個直播畀大家了解多啲 Kākāpō 嘅保育工作
之前有一日直播畫面突然間黑咗
大家都勁緊張：「Nora BB 點呀？唔好嚇我呀！」
好彩最後發現係技術故障。冇計啦，呢度真係好偏遠㗎

要提高 BB 嘅存活率，
保育團隊要做好多工作，
例如進行人工孵化，
又要有策略咁安排邊個 mami 照顧邊個 BB
令到唔好有 mami 太忙，又或者畀年輕嘅鴞鸚鵡早啲有育兒機會等等
目前有 95 隻雛鳥慢慢成長緊
當然未來幾個月，佢哋仲會面臨好多挑戰
直至到咗 150 日嘅里程碑
佢哋先會正式納入官方嘅統計數據
好感謝保育團隊嘅堅持同努力
BB 們加油啊！